خذني معك

تعال لي وخذني معك..
أسمع كلامك وأتبعك..

تعال يكفيك الغياب..
اللي بعنادك يمنعك..

طالع هنا كلك هنا
هذي العيون تطالعك..

تبكي دمع لك وأستمع..
وخذني معك خذني معك..

مريت والدنيا صباح..
أشم وردك وأفرعك..

لكن تعبت وجا الظلام..
وكل شي فقدته رابعك..

إستراحه

ليتك قبل ما يحين نومك تنادين..
قلبي الذي بالشوق مل إنتظاره..

من يوم ما صار الغلا قاب قوسين..
ضاع الوفاء اللي بنينا جداره..

رحتي وناديتك ولكن على مين..
صوتي حدوده غرفتي يا خساره..

مره يجي فالبال إنك تعودين..
ومره يويلي من غيابك وناره..

ضاقت سنيني بين ما تطلبه العين..
وما بين روحي لي تدور عـ ساره..

ولقيت لي بعد الصبر للمجانين..
ناتج يريح من يهمه إختياره..

الحب في هذا زمن ما هو بزين..
ما دام يرفع في الجسم هالحراره..

واللي يريد يحب يلجأ لحلين..
يا ينتحر أو يعترف بالخساره..

لكنني أتنفسك ضحكة سنين..
وأبكيك دمعن ما يلومه قراره..

ما أعيش من دون أذكرك لو بتنسين..
ناصر وجواله وليله ونهاره..

لأني وعدتك دين وتذكري زين..
الحب ما هو لعب فن وشطاره..

والحب ماهو شعور يبقى ليومين..
الحب ماحد جاب وصفه بعباره..

ويش فيني؟

الأشواق ما تسأل قبل ما تجيني..
وإلاّ بسوي لوك عالباب وأرتاح..

مره تضّيع أحلى نومه بعيني..
ومره لذيذ الزاد أتركه وأنزاح..

صعبه عليّه غيبتك صدقيني..
والقيد في يدك على رغبتك طاح..

من عاد لي وأنتي كذا بتتركيني..
من هو يعوض حضرتك قول يا صاح؟؟

غبتي وعطيتك عذر بعد بتجيني..
واليوم غيرك يحكمك والوصل راح..

بالله تعالي تتحسسي ويش فيني..
من دون أكتبلك سواليف وجراح..

تعالي

تعالي نكبر شويه..
تعالى نحرق الآهات..

تعالي نصفي النيه..
ونندب حظنا بسكات..

من أول لحظه عفويه..
إلى حلم بيدينا مات..

سكتنا بدون حنيه..
ولهيب أشواقنا بالذات..

ونكبر والغلا فيه..
يصيب القلب بالنوبات..

تعالي مابقت ليه..
رجاوي تشفع الغيبات..

أبي أسمعك حنينه..
وأبي أتنفسك سلوات..

جربها وإنساني

بدون حبك يضيق الكون يا عمري..
قوم وتخيل وجربها وإنساني..

وش إنت حسيت؟؟ قلي وراضي بأمري..
هل هو غيابي سهل يا كل خلاني؟!

هل صدق جربتها أو ما تبي تدري؟؟
طعم الغياب الخطير يجهز أكفاني..

يا روح روحي ويا قلبي ويا شعري..
من لي سواكم وطن يقبل بجثماني..

كل يوم صابر على حلوي وعلى مّري..
أستنشق رضاك وأزفر كل حرماني..

لو لان عودي بما مكتوب في قدري..
لسه قوي بالأمل والحب وجناني..

ما جاي أبرهن عشان أسوق لك عذري..
خذني بيدنك وطالعني وإقراني..

بتشوف دمي كتبلك حبنا العذري..
من دون تسأل بتحضني وتبكاني..

هذا غلاكم من أول يوم في عمري..
حاول تجرب تدورني وتلقاني..