نهاية عهد القبيله

خذني معــك ياللي مســـافر ودوار..
غربة وطن وأصحاب.. عز ومهابه..

‏ ‏خذني معك أتعـــلم الـــدنيا أسفار..
وأعيشها غــربه ولا وسط غــابه..
‏ ‏
مليت من كلمة أهل ساس وستار..
والشيمه والفزعات وأصحاب لابه..

مليت أســـــمع هالقبـائل لها ثاار..
وأخــــــوان شمه والكلام المجابه..

ما دامــــنا نذبح كما ذبح الأبقار..
ولا يثــــور في دم القبيلي طلابه..
‏ ‏
يا هيه بن مقبال يا راس يا نــار..
كم دم ســـال وما أستلمنا حسابه..

كنا فخـر وأمثال وأخبار وأشعار..
واليـــــــــوم ضيعنا بيدنا المهابه..

كنا جبال الحجر في وجه الإعصار..
ونجرف إذا دنت رعود الحــــرابه..
‏ ‏
واليوم شوف العار يركض لكل دار..
ما جابهه عن وصلـــــــنا أي جابه..

صرنا مع التجــــار وريـــال منهار..
والخوف بانت في نفوســـــنا نيابه..

والمصحـــله تلعب بنا يمين ويسار..
وصار الأخو يمنع لخو من شـرابه..

وتغيرت الأحــــكام والعرف والدار..
وصارت عبادتنــــــا لفلس وخرابه..

لا ديـــــن يربطنا ولا حــــق للجار..
حـــــتى صلات الدم مــاهي اتشابه..

قم شوف يا جدي حفيدك والأخـبار..
والأهل والاصـــحاب وأهل النسابه..

اللي لهم ساحات حــــــربن وآثار..
تحكـــي شواهدها حصون وكتابه..

قم شوفني يآئس وحاير ومحتار..
وتفـــــــرقوا عني الربع والقرابه..

قم شوفني أبكي علـــى دم الأخيار..
ومالخوف ما أقدر أعسف الذبابه..

قم شوف ما للأهل من ورث وآثار..
باعوه أحفـــادك وضحوا بترابه..

خذني معـــك ياللي مسافر ودوار..
غربه وطن لا غربتي في القرابه..